大齌期操練分享 – Gary助導 (Part 1)

大齋期第一天操練(20180304)

首先今日就要進行食三餐操練,我覺得真係好有難度,因為真係一個操練頂三個操練,又唔可以食零食,同時又要迫自己食三餐。同埋真係要操練自己好警醒啊,因為如果唔小心食咗零食,嗰一日就唔能夠做到呢個操練。

當中最深刻嘅地方就係有好多嘅地方祈禱。我係要為曙光之家,同埋為五餅二魚祈禱。

其實好深刻嘅地方,係因為係當中多咗了解家的事情,同時都不斷提醒自己係呢個地方事奉嘅時候,需要擺上祈禱! *「你們要先求他的國和他的義,這些東西都要加給你們了」* 操練中,祈禱真係咁就好深,如果唔係祈禱,都係好少可以關注到。記得成日都提自己要愛曙光之家,但係都唔知點樣入手,但正正祈禱就係一個途徑使到自己記念。

而為五餅二運動祈禱的時候,感受到好深嘅就係係一啲比較落後嘅國家,佢哋嘅教會真係可能會面對着天災嘅影響、教會建築物結構嘅唔安全、等等嘅問題,原來我哋一小部份嘅錢,就已經幫到佢哋好多好多,多到我哋難以估計。回想自己所身處嘅地方,其實真係一些微小會行動就真係幫到佢哋超多,只要我哋願意付出你自己,就真係係要運動上面有份了。

而當我地幫到教會嘅時候,教會就原來成為左好多家庭嘅盼望。包括支離破碎的家庭,遮風擋雨,面對着社團暴力。其實係呢刻好感動,我哋嘅微小奉獻原來去祝福到咁多人,都發現到自己有陣時後,都有好多享樂如鍾意飲嘢,就會係咁放縱自己買野飲,所以今日大齋期都要節約自制,降低自己生活水平,將有餘嘅去放係五餅二魚運動,獻上自己微小行動。同時又真係好真係學習耶穌捨己嘅行為。

要盡心、盡性、盡意、盡力、愛主我的神

—————————————————————————————————————————————————————————

大齋期第二日操練(20180305)

今日覺得最難的是一日只可三餐,仲要唔可以過$35。真係超超超超難,因為早午晚三餐的節奏都有所打亂。仲要運動完不能飲運飲品(因為一飲就會計算了一餐),只能飲水。而係局食飯如果飲咗汽水又會超咗$1,Ahhhhh!!!我真係覺得好難忍。但又覺得深刻,這不正正是過一個攻克己身的大齋期,這個月就係要對付自己的慾望,希望可以繼續頂得住!

另外又係祈禱中得著好深,係亞洲其他地區生活的牧者真係要面對好多生活逼人的環境,雖然如此,但他們仍然倚靠神,沒有因此退縮。而今天我所身處的環境,好他們N倍。更沒有藉口說放棄,沒信心。

而在這兩日當中,做操練覺得好有意義的地方便是,平日可能會花費好多時間係手機上,而今年操練並沒有說要不做什麼,而set咗『要』做什麼!而這兩日所花時間真係好多,兩起碼2小時,但正正覺得非常滿足,因為有完成操練後所帶來的喜悅及因祈禱所得著平安。

「且愛耶和華-你的神,聽從他的話,專靠他;因為他是你的生命,你的日子長久也在乎他。」」
‭‭申命記‬ ‭30:20‬上

—————————————————————————————————————————————————————————

大齋期第三日操練(20180306)

原來只係過咗三日,但好似過咗成個星期咁,時間過得好漫長。特別係一日三餐且不超$35上,格外困難,一個操練真係可以做緊4-5個操練咁,又唔可以食零食,如果唔係就會計為一餐,做運動嘅時候又唔可以飲有味飲品,如果唔係又要計一餐。回想昨日在返工中,因為每餐計算$30,若果要飲汽水就要加$6,咁就超過$1,即係係唔係都冇得飲汽水
雖然咁講好似埋怨緊,不過又覺得好有意思,咁樣真係好提醒自己過緊大齋期。今日吃早餐,同事都好遷就我,使我今日可以食到低於$35的早餐。其實回想好幾年,我都有逃避過立呢個操練,因為真係超超超超超超級無敵難,但估唔到今年被動地做呢個操練,都係時候話俾自己知唔可以再逃避。

另外今日與同工分享我的操練時候,都分享到五餅二魚運動,被同工分享到其實我應該要見到我們教會的人樂意分享的心。回想之前牧師話,建堂時候,呢個咁艱難的時期,教會沒有停止五餅二魚運動,其實真係好勁,就想到段經文,「我知道怎樣處卑賤,也知道怎樣處豐富;或飽足,或飢餓;或有餘,或缺乏,隨事隨在,我都得了秘訣。 我靠着那加給我力量的,凡事都能做。腓立比書‬ ‭4:12-13‬」‭,當時牧師真係作了好好教導,今日咁睇就學習到咩叫信心。

其實做了3日操練都不斷地祈禱。而真係在祈禱中得著力量,得著提醒。我都要繼續堅持做操練,要學習改變心態,不是為做而做,而是在操練中,默想與主耶穌的關係。要為自己加加油。

—————————————————————————————————————————————————————————

大齋期第四日操練(20180307)

今早本身返完晨更,係好想去睇戲,而打算睇之前係要先返新堂靈修。點知今日靈修簡直當頭棒喝,今日就問有什麼令我們不肯離罪,咁就想想下,認識了自己係一個享樂的人,有什麼事都想享受咗先,之後先去做其他事情,亦都因為自己想好快得到一樣東西或物件,而因此外養成自己只為短暫的快樂。有時候都因此而使自己逃避或拖延應做的事工,而使自己會有唔想服侍的心態。而今日靈修都應承咗上帝要學習以屬靈事為先,要先求他的國和他的義。所以就決定等自己搞掂咗事奉先去睇。

而今晚的塵土認罪祈禱會,讓我可以再靜下來面對自己,係祈禱會中,可以再提醒返自己有幾容易犯罪,而上帝的愛有幾深,「天離地有多高, 他的慈愛向敬畏他的人也有多大。 東離西有多遠, 他使我們的過犯離我們也有多遠。‭‭詩篇‬ ‭103:11-12‬」亦都係因為咁,而使自己可以省察罪孽。

—————————————————————————————————————————————————————————

大齋期第五日操練(20180308)

今日意外地多了很多時間做到操練,因為入咗深圳灣。而當下心裡有少少開心,但原來都有著試探,因為一多了時間就真係好容易會做其他事,如loop下FB,ig⋯⋯不過下午就悔改,因為要愛惜光陰,常常都教導小羊要把握時間,所以我都靈修,今日靈修其實有點難且又好貼身,「如何才能做到謙卑,免得走上靈性滅亡之路」,今日想咗好耐,就想到個行動,當自己會驕傲時要先問自己「今日我的信仰光景如何,夠未呢?能夠為耶穌行多步」,靈修中又提醒自己唔好以自己標準去取替上帝標準,嘩,真係信得愈耐,人愈容易靠自己,當下有段經文提醒
「所以,我們應當離開基督道理的開端,竭力進到完全的地步,不必再立根基,就如那懊悔死行、信靠神。希伯來書‬ ‭6:1‬」
就係需要回到起初信主的赤子之心,要多信靠神,做事要竭力,唔好行捷徑。

另外就係祈禱得著。今日為拉丁美洲祈禱,感受當地的暴力,好多教會的建築物好不穩陣,其實真係有危險,而當地人仍然堅持返教會的決心好感動我,使我更覺要努力在大齋期做好操練,要降低一級生活,多多節省金錢作支援及為他們代禱。

最後一個便是與小羊同行,有2個小羊都面對住操練,因為困難而無做,所以與他們同行,發現在同行中其實他們都有能力,只是他們唔識,所以好想係大齋期行多步,與他同行一齊經歷,耶穌受苦之路。

—————————————————————————————————————————————————————————

大齋期第六日操練(20180309)

今日好突然地收到KT的電話,邀請我去澳門整嘢,咁我放工又得閒,所以就陪他去了。不過當下,我自己就想到,大齋期嘅城操練一日只可三餐且少於$35。咁就瞬間覺得好難,心諗今日衰硬,去咗澳門點會唔食得貴,真係超級無敵勁難。不過知道自己軟弱嘅時候,我就同kt講返我的操練。而最終我都能夠堅持到呢個操練。其實係某一刻,我心裏面都有同自己講「其實都係得一日完成唔到姐,冇所謂嘅。」不過我再同自己講番要守住呢個操練,其實同時都好多謝kt肯陪我一齊去進行呢個操練。已透過做操練嘅時候,我深深感受到自己心裏面,係有好多慾望嘅聲音,好想去享受。但同時都想到自己作為助導嘅身份,要更加謹慎自己。但發現其實呢個操練最重要都真係要把自己嘅生活,降低一級以經歷少少苦楚,與受苦嘅耶穌一齊同行。

第二個深刻嘅地方就係,與同工分享大齋去操練,發現滿有上帝的恩典,其實本身都唔知道定立咩操練,有諗過但又無頭水,咁啱見到牧者嘅操練有為五餅二魚行動祈禱,咁又覺得幾好喎,就跟住嚟定啦。跟住有一日返工,整理過去嘅分享,先發現原來2017年得好少分享,咁就好想透過大齋期分享自己操練嘅感受。其實上帝真係好帶領,透過做呢個操練,之後每天了解世界各地教會所面對嘅事,以至於使我深受感動。同事每天都透過咁樣分享,又去整理自己每日大齋期與主同行的經歷。不得不說返「 *感謝神,因他有說不盡的恩賜!* 哥林多後書‬ ‭9:15‬ ‭」

希望明天繼續堅持⋯⋯

—————————————————————————————————————————————————————————

大齋期第七日操練(20180309)

其實今日操練心覺好難,因為今日同工聚要去啲島團契,而因為要做大齋期操練,就需要帶cook set,煮嘢食,真係為了操練,可以去到幾盡。當完了聚會後,身體所帶來的疲倦,使自己好唔想做操練,好想一覺訓,但深知若在操練上有即卻,下一次將會出現,那時就好感到保羅講 *「我也知道,在我裏頭,就是我肉體之中,沒有良善。因為,立志為善由得我,只是行出來由不得我。‭‭羅馬書‬ ‭7:18‬ ‭」*。當下就真係訓咗覺。到夜晚起身就先去操練,雖然都係做了,但都真係好似任務式。在這個大齋期要再好好認清自己係一個點的人,要撇棄肉體的慾望,竭力進到完全的地步。

今日祈禱得著係見證到宣教士對傳福音的那份承擔,今日為印度及菲律賓宣教士祈禱時,見到他們願意接受差遣由美國到這地方,要重新開始認識這地方。其實事奉都曾想過,若是被主差我去一個陌生地方,可能係工作,學校,事奉的團隊,我會點面對呢,今晚覺得被他們提醒 *「要收的莊稼多,做工的人少。馬太福音‬ ‭9:37‬ 」* 另外就係林文尼路牧師的太太接任柬埔寨的牧者領袖,但要面對獨力照顧15歲女兒,我真係被激勵,因為此人能夠面對困境時仍展現出強勢信仰。

#明天要好好在崇拜中敬拜

—————————————————————————————————————————————————————————

原載於Gary Facebook

105 total views, 1 views today

發表迴響